摘一文更详细：
广州话当中有一句既古老又形象嘅俚语，叫做“讲耶稣”。所指嘅就系当年作为全中国唯一开放口岸嘅广州，来自葡萄牙嘅天主教传教士(耶稣会)，一日到黑跟住你传教，嗰份耐心绝对系无可挑剔口架。但系由于广东先民多数信奉佛教同其他本土神，对天主教兴趣唔大，唔信教亦都好宽容啵，任由呢啲传教士喺度啰啰嗦嗦。不过就扣顶高帽畀佢哋，叫“讲耶稣”。将鬼佬布道宣教称为“讲耶稣”，意为没有建设性嘅讲废话。周星驰嘅电影《大话西游》当中，罗家英扮演嘅唐僧口噏噏“南呒南呒”，实际上就系取材于广东话嘅“讲耶稣”啰。引申开来，“讲耶稣”意思就系形容讲一啲太过理想和不切合实际嘅话、宣讲空头大道理。
好似近牌有个同事，成日讲耶稣，向我哋灌输“宁做创业狼，不做打工狗”嘅思想，开口埋口就“趁后生，快啲着草”。啲同事问佢有咩谂法、有乜路数啊噉，佢就咦咦哦哦，一句“到时先算啦，见步行步，食脑吖嘛”，出面风大雨大，做咩啊？点闯啊？衰咗点算啊？佢就话“马死落地行咯”。扯，正一大只广，得把口！吹水唔抹嘴啦，一冇计划二冇打算，净系谂住工资奀，就想踢爆唔捞、炒老细鱿鱼？噉同盲头乌蝇有咩分别啊？到头嚟咪又系“讲就天下无敌，做就有心无力”咯。
